Depressie

 Herfs se kleure, goud en geel

wat somer se warm dae steel.

Droё blare wat in die windjie speel,

en vroegaand bibber met die winter deel.

As boomstamme kaal en naak

oor dorre velde waak,

yskristalle onder voete kraak,

soek koue donker binne wraak!

Kopiereg: Marie Greyvenstein

Lewenskring

Daar het 'n doringboompie

langs die bergrivier gestaan.

Groen takkies beur al hoër,

wortels wat diep in die water staan.

En eendag kom daarlanges

'n houtkapper met sy byl verby,

kap takke vir sy vuurtjie

terwyl boompie teen 'n harstraan stry.

Ook het die loop van jare

die ouderdom gebring.

Die boompie word al ouer,

verminkte lewenskring.

Die doringboom is nou bejaard

en tyd stap stadig aan,

doringreus se bas word broos en bros

as jare kom en gaan.

Kopiereg: Marie Greyvenstein

 Vergewe en vergeet van Totius was die inspirasie vir hierdie gedig.

Ontvlugting

 As bekommernis op my skouers druk,

my voete abrub onder my uitruk,

smart en vrees 'n sware juk,

dan is die wye oseaan my kruk!

As stiltes oor die aarde vee,

ek in die skemering oor duine tree,

hoor ek die gedruis wat lewe gee,

die bewegende water uit die see!

Kopiereg: Marie  Greyvenstein

Houtkruis

Deur die via Dolorosa gestap

oor stene uit klippe gekap,

kniel langs die Koning se kruis

'wyl 'n storm oor Golgota ruis.

Daar is die ruwe krusifiks van eik

grof, onafgewerk wat na die hemel reik

met bloedvlekke op die hout

en my Heer se trane, sout.

Die angs en die pyn,

die dors se suur asyn,

plek van beproewing

van  lyding, vernedering ... vergewing.

Maar die lug trek oop

die houtsuil se stille hoop

dit is die houtkruis, die redding, die leiding

die boodskap van bevryding.

Kopiereg: Marie  Greyvenstein

Swellendam

 saggies skerts en speel die windjie

deur die blare van die boom

goue blaar nie goed geheg nie

gaan met die bries op reis

dwarsoor Swellengrebelstraat

draaiend oor De Groote Wagenweg

op vlerke na die ou Drostdy

en oor die Korenlandsrivier

so toer die akkerboom se blaar

op sy rit na Langeberg

en by die ou wabrugdrif

begin die wind se sterkte taan

stadig spiraal die akkerblaar

grondwaarts ... af ... af ... af

vertrap deur skoen en wiel

hy sterf ...  

sy reis verby

Kopiereg Marie Greyvenstein

Skimme

Saans

as die mense wat ek liefhet

my drome vol kom staan

en uit elke steeg en straat

stemloos met my praat

Soggens

as die mense wat ek liefhet

soos skimme voor die son verdwyn

en ek met heimwee

'n verdrietige traan van my wange vee

Kopiereg; Marie Greyvenstein