‘n Tarentaal se kras alarmroep
onder
kameeldoring se blaarsambreel
wanneer
beeste bulkend huistoe troep,
veilig’ slaapplek in die kraal te deel.
Afrika natuur toneel
waar hanslammers knuppeldik gesuip
uitbundig in die lang gras speel
‘wyl die laaste strale oor hulle koppe kruip.
Ligstrale sak stadig oor die westerkim,
goue mielielandebaai in die sakkende son
se laaste oranje glim;
vir eers die nagsê van ‘n lewensbron.
Agter die maan wink ‘n grys wolkbank
in gedagtes klink die veraf klank
van ‘n tarentaal se kras alarmroep
onder kameeldoring se blaarsambreel!
© Marie Greyvenstein
Geen opmerkings nie:
Plaas 'n opmerking